| |
| அரிமழம் சத்திரம் காமாட்சியம்மன் திருக்கோயிலில் சிவராத்திரி விழா Feb 13, 10 |
| |
புதுக்கோட்டை, பிப். 12: புதுக்கோட்டை மாவட்டம், திருமயம் வட்டம், அரிமழம் அருள்மிகு சத்திரம் காமாட்சியம்மன் திருக்கோயிலில் சிவராத்திரி விழா வெள்ளிக்கிழமை கோலாகலமாக நடைபெற்றது.
விழாவையொட்டி, நூற்றுக்கணக்கான பக்தர்கள் பால்குடம், காவடிகளைச் சுமந்து அம்மனை வழிபட்டனர்.
இங்கு ஆண்டுதோறும் நடைபெறும் சிவராத்திரி விழா மற்றும் பாட்டையா குருபூஜை திருவிழா இப்பகுதியில் பிரசித்தி பெற்றதாகும். மிக விமரிசையாக நடைபெறும் இவ்விழா நிகழாண்டில் வெள்ளிக்கிழமை நடைபெற்றது.
நவராத்திரி திருவிழாவையொட்டி காலை 11 மணிக்கு அரிமழம் ஜெயவிளங்கி அம்மன் கோயில் அருகிலிருந்து மஹாகணபதி ஹோமம் மற்றும் சக்தி பூஜை நடைபெற்றது. தொடர்ந்து, பால்குடங்கள், காவடி ஊர்வலம் தொடங்கியது.
பாலக்கோடு பம்பை வித்வான் கே. குமாரவேல், சுனையக்காடு சுப்பையா குழுவினரின் நையாண்டி மேளம், ஒயிலாட்டம், நடிகர் குள்ளமணி குழுவினரின் நடனம் ஆகியவற்றுடன் ஊரின் முக்கிய வீதிகள் வழியாக சத்திரம் காமாட்சி அம்மன் கோயிலை ஊர்வலம் வந்தடைந்தது.
இதைத் தொடர்ந்து, பகல் 1 மணியளவில் அம்மனுக்கு நடைபெற்ற பாலாபிஷேக வழிபாட்டில் திரளான பக்தர்கள் பங்கேற்றனர். தொடர்ந்து, மாலை 6 மணியளவில் திருவிளக்கு வழிபாடும் இரவு 10 மணியளவில் வாணவேடிக்கை மத்தியில் அம்மன் திருவீதியுலாவும் நடைபெற்றன.
விழா ஏற்பாடுகளை விழாக் குழுவினரும் காமாட்சி அம்மன் நற்பணி மன்றத்தினரும் இணைந்து செய்திருந்தனர்.
Source:Dinamani
Feb 13, 2010 |
| |
| |
|
|
|
